ابني قاللي: ماما، روبلوكس عم تموت (قصده اللعبة فيها مشاكل) قلتله: وشو يعني.. "كل من عليها فان.. ويبقى وجه ربك ذو الإحسان"
نحن بالبيت دايما منناقش فكرة الموت، وانه ليس نهاية الانسان لانه هي الحياة مجرد مرحلة عم نعيشها ورح تخلص حتماً..اي نعم، الموت فاجعة.. والفراق صعب وموجع جداً وبتحس قلبك رح ينشلع من مطرحه لأنك ماعاد تشوف هالغالي...
لكن مو لازم نموت نحنا كمان ورا اللي راحوا قبلنا، ونخلي حياتنا توقف ونتجمد بالزمن الى ان يصير دورنا بالرحيل من الحياة الدنيا..والا ليش الحداد بالاسلام ما بيتجاوز ايام معدودة، وممنوع النواح والندب على الميت؟
فكرتي هي انه صار الوقت نبدا "نتدرب" على انه نعتبر الموت شي طبيعي متل الولادة.. دخول وخروج ببساطة..
على الاقل على الاقل لما موت، ارجو انه اولادي ما ينفجعوا بموتي ويتربوا بذهنية انا يتيم ويتحولوا لضحية لاسمح الله..
بعض الناس بيربطوا هويتهم بالموت، بصير بطاقة تعريف: "انا اخت فلان اللي مات بحادث سيارة وهو بعده شب"، "انا ابن فلان اللي مات بجلطة بالشارع"، "انا زوجة فلان اللي مات بعد زواجنا بخمس سنين وتركلي ٣ اولاد يتامى"...
وهكذا.بعرف كلام قاسي، ويمكن القارئ يقول تنظير وفلسفة.. بس الحقيقة هي انه كل حدا بيولد لازم حتماً يموت بعد ما يستوي اجله بالفيمتو ثانية بغض النظر عن الطريقة..
موضوع صعب ينبلع، اكيد.. مشان هيك بالذات محتاجين نحكي عنه اكتر مشان لما يصير يكون الوجع محمول...
عموماً، الله يقدرنا نعيش العمر تبعنا بالخير والبركة واليسر نقدر نترك بصمة خير بقلوب اللي عرفونا وعرفناهم ونعمل شي لآخرتنا...والله يطول اعماركم جميعاً بالصحة والسعادة والحب والغنى
واهم شي الله يخلصنا من هالروبلوكس والبوبجي وباقي الموبقات الالكترونية.. قولوا آمين
وشكراً